Barack Obamaer 49 ára í dag. JIM YOUNG

Barack Obama forseti Bandaríkjanna er 49 ára í dag. Stuðningsmenn forsetans um land allt ætla að halda upp á daginn. Obama á hins vegar við margvísleg vandamál að stríða og vinsældir hans hafa dalað.

Þegar Obama tók við embætti forseta fyrir 18 mánuðum síðan voru 2/3 Bandaríkjamanna ánægð með forsetann. Nú lýsa innan við helmingur kjósenda sig ánægð með störf hans.

Joe Sestak sem berst fyrir kjöri í öldungadeild fyrir Pennsylvaníu-fylki sagði í samtali við BBC að hann vildi frekar fá Michelle Obama, konu forsetans, í heimsókn en forsetann sjálfan. Kosningarnar fara fram í nóvember og óttast demókratar að útkoma frambjóðenda flokksins verði ekki góð.

Þrennt hefur valdið Obama mestum erfiðleikum. Miklir erfiðleikar hafa verið í efnahagslífi Bandaríkjanna og þó að flestir geri sér grein fyrir að erfiðleikarnir séu ekki forsetanum að kenna þá ætlast Bandaríkjamenn til þess að hann komi hlutunum í lag. Efnahagsbatinn hefur verið hægur og atvinnuleysið er mikið. Það mældist 9,5% í síðasta mánuði og talið er að það sé heldur að aukast en að minnka.

Olíuleikinn á Mexíkóflóa hefur líka haft áhrif á vinsældir Obama. Hann hefur verið duglegur við að heimsækja svæðin sem hafa orðið verst úti og verið harðorður í garð BP. Margir Bandaríkjamenn skilja ekki að það skuli hafa tekið þrjá mánuði að skrúfa fyrir lekann og óánægjan með þetta bitnar á forsetanum.

Vísbendingar eru einnig um að stríðið í Afganistan sé farið að hafa neikvæð áhrif á vinsældir Obama. Fjöldi hermanna sem hefur fallið hefur verið að hækka og fréttir berast af því að stríðið gangi verr en haldið hefur  fram.