Hip hop tónlistarmaðurinn Wyclef Jean hyggst bjóða sig fram til forseta í heimalandi sínu, Haíti. Hann skýrði frá þessu í sjónvarpsviðtali við BBC í Port-au-Prince þar sem hann er staddur til að ganga frá framboðsumsókn sinni.

Við komuna til Haíti var Wyclef og eiginkonu hans fagnað af tugum stuðningsmanna.

Wyclef, sem býr í Bandaríkjunum, þarf að sýna fram á að framboð sitt sé lögmætt en hann ólst upp í Bandaríkjunum og hefur tvö vegabréf. 

Árið 2007 var Wyclef útnefndur sérstakur sendiherra Haíti og vill meina að sú útnefning komi í stað skilyrðis um fimm ára búsetu á Haíti en nefnd mun taka fyrir umsókn hans til forsetaframboðsins.

Frestur til að tilkynna framboð um forsetaembættið á Haíti rennur út á morgun en kosningarnar fara fram 28. nóvember.

Listi með samþykktum forsetaframbjóðendum verður birtur 17. ágúst.

Í sjónvarpsviðtalinu á BBC sagðist Wyclef hafa ákveðið að bjóða sig fram daginn eftir jarðskjálftann. „Ef ekki hefði verið fyrir jarðskjálftann hefði ég beðið í 10 ár til viðbótar með að bjóða mig fram.“

Wyclef Jean öðlaðist heimsfrægð á tíunda áratugnum með hip hop hljómsveitinni The Fugees og er ákaflega vinsæll á Haíti, þar sem helmingur íbúanna er undir 21 árs aldri.

Nýjum forseta Haíti bíður mikið og erfitt verk við uppbyggingu eftir jarðskjálftann sem þar reið yfir í janúar.

Wyclef hefur látið til sín taka við góðgerðarstörf eftir jarðskjálftann og heimsótti heimalandið fljótlega eftir skjálftann til að átta sig á stöðunni þar. Hann hefur síðan verið virkur sem sérstakur sendiherra við að kynna fyrir heiminum þær hörmungaraðstæður sem Haíti býr við.