Að minnsta kosti 50 námuverkamenn eru nú í sjálfheldu neðan jarðar eftir að eldur kviknaði í gullnámu í austurhluta Kína í dag. Upphaflega voru 64 fastir í námunni en tekist hefur að hjálpa 11 manns út.  Björgunaraðgerðir standa enn yfir.

Allt rafmagn datt út í göngunum við slysið en hinsvegar streymir súrefni um a.m.k. suma hluta ganganna, að sögn kínverskra fjölmiðla. Talsmaður yfirvalda í borginni Yantai, þar sem náman er, segir að yfir 200 manns hafi tekist að flýja eldinn. Enn er ekki vitað hvort dauðsföll hafi orðið í eldsvoðanum. Rannsókn á frumstigi bendir til þess að eldurinn hafi kviknað út frá rafmagnskapli sem grafinn var í jörðu. Fleiri upplýsingar hafa ekki verið gefnar.

Námuiðnaður er umfangsmikill í Kína en spilling og holóttar reglugerðir há honum mjög og eru mannskæð slys tíð, þar sem námugreftri er flýtt til að mæta síaukinni eftirspurn eftir orkugjöfum. Fyrr í þessari viku lést 21 og 12 sátu fastir í tveimur kolanámuslysum.  Á síðasta ári lést alls 2.631 námuverkamaður í Kína samkvæmt opinberum tölum, en verkalýðsfélög telja að raunveruleg tala látinna sé mun hærri þar sem reynt sé að hylma yfir mörg slysin.