Frakkar voru harðlega gagnrýndir af sérfræðingum Sameinuðu þjóðanna sem fara með málefni tengd kynþátta- og útlendingahatri í gær. Tveggja daga pallborðsumræður um málefni Frakklands á þessu sviði hófust hjá SÞ í gær og verður þeim framhaldið í dag.

Nefnd SÞ um útrýmingu mismunar vegna kynþáttar er að fara yfir beiðni sendinefndar Frakklands um hvort ríkið standist alþjóðlegar kröfur varðandi mannréttindi tengd kynþætti.

Er afar óvenjulegt að jafn stórt Evrópuríki og Frakkland sé jafn harðlega gagnrýnt og gert var í gær. Var þar meðal annars vísað í meðferð Frakka á sígaunum, umræðu um ríkisfang og innflytjendur, réttindi minnihlutahópa og mun harðari pólitískrar umræðu gagnvart minnihlutahópum.

Forseti Frakklands, Nicolas Sarkozy, tilkynnti í síðasta mánuði að búðum sígauna yrði lokað og hótaði því að franskir ríkisborgarar sem eru fæddir annars staðar en í Frakklandi geti misst ríkisborgararéttinn ef þeir verða uppvísir að lögbrotum.

Var aðgerðum franskra stjórnvalda gagnvart sígaunum líkt við þær aðgerðir sem tíðkuðust í Frakklandi á tímum síðari heimstyrjaldarinnar þegar Vichy-stjórnin, sem stjórnaði í Frakklandi frá júlí 1940 til ágúst 1944, með stuðningi Nasistaflokksins þýska, var við völd.