Aðildarríki Evrópusambandsins þrátt nú um það hvernig eigi að hátta tekjuöflun þess. Reuters

Janusz Lewandowski, yfirmaður fjárlagagerðar hjá Framkvæmdastjórn Evrópusambandsins, reynir enn að ná fram beinum sköttum innan ESB, þar sem borgarar aðildarríkjanna greiði beint til sambandsins. Hann er nú að reyna að semja um róttækar breytingar á tekjustofnum sambandsins fyrir næsta sex ára fjárlagatímabil, frá 2014 til 2020.

Vegna samdráttar er nú gat í fjárlögum ESB sem menn vilja nú fylla með því að leggja á beina skatta. Þar sem aðildarríkin hafa almennt ekki tekið vel í þetta hefur hann lagt til að framlög ríkjanna til sambandsins verði minnkuð um 30-40 milljarða evra á móti.

Þá hefur hann sett fram ýmsar mögulegar leiðir, til þess að halda árlegum tekjum sambandsins í kringum 140 milljarða evra, eða rétt um 1% af vergri landsframleiðslu aðildarríkjanna samanlagt. Nú er verið að fínpússa tillögurnar sem lagðar verða fyrir ríkisstjórnir landanna og Evrópuþingið í næsta mánuði.

Lewandowski heldur því fram að beinir skattar séu ,,möguleiki”. Bretar og Frakkar hafa hvorir um sig lýst yfir andstöðu sinni  við þau áform og Pierre Lellouche, Evrópumálaráðherra Frakka sagði að áformin væru sérstaklega illa tímasett og myndu fela í sér ,,meiriháttar framsal á fullveldi.”

Aðrir eru jákvæðari. Jose Luis Rodriguez Zapatero, forsætisráðherra Spánar, segir að hugmyndin ætti að koma til skoðunar ef hún styrki Evrópusambandið. Melchior Wathelet, fjármálaráðherra Belgíu talar fyrir því að núverandi leiðir sem farnar eru í því að fjármagna ESB séu óæskilegar.

Lewandowski sagði við PAP fréttastofuna í Póllandi, heimalandi sínu, í vikunni að fjármálaráðherrar ríkjanna væru að segja við hann: „Haltu áfram að leita. Kannski finnurðu eitthvað sem gerir okkur kleift að minnka framlögin til ESB.” Ef það tækist ekki vöruðu ráðherrarnir við því að skattaáformin gætu strandað á löndum eins og Frakklandi, Þýskalandi og Bretlandi.