Útlit er fyrir spennandi kosningar í Ástralíu um næstu helgi ef marka má skoðanakannanir sem birtar hafa verið. Í skoðanakönnun sem birt var í dag var fylgi stjórnarflokkanna og stjórnarandstöðunnar nánast það sama.

Forsætisráðherra Ástralíu, Julia Gillard formaður Verkamannaflokksins, á í harðri baráttu við Tony Abbott formann Íhaldsflokksins og er afar mjótt á munum. Telja ýmsir stjórnmálaskýrendur að í fyrsta skipti í sjötíu ár sé jafnvel möguleiki á að minnihlutastjórn muni ráða ríkjum á þingi landsins.

Samkvæmt könnun Roy Morgan fengi Verkamannaflokkurinn og þeir flokkar sem standa við bakið á honum í ríkisstjórn, 51% atkvæða á meðan Frjálslyndisflokkurinn og Þjóðarflokkurinn, sem eru í stjórnarandstöðu 49% atkvæða.

Samkvæmt fréttaskýringu sem birtist í Morgunblaðinu í sumar notast Ástralar við forgangskerfi við þingkosningar þar sem annar og þriðji valkostur getur endað sem atkvæði, fari svo að fyrsti valkostur í flokkakjöri nái ekki meirihluta í kjördæminu.

Gillard sór í júní embættiseið sem forsætisráðherra Ástralíu, fyrst kvenna í nútíma stjórnmálasögu Ástralíu sem hófst árið 1901. Hún fór með sigur af hólmi gegn Kevin Rudd, sitjandi forsætisráðherra frá 2007 í óvæntum formannskosningum á flokksþingi ástralska Verkamannaflokksins fyrr í mánuðinum.

Gillard er lögfræðingur að mennt en 29 ára gömul varð hún fyrsta konan sem varð meðeigandi í lögfræðifyrirtækinu Slater & Gordon. Þingferill Gillard hófst 1998 en 9 árum síðar varð hún fyrst kvenna aðstoðarforsætisráðherra.