CHRIS WATTIE

Sænsk stjórnvöld ákváðu í dag að hefja rannsókn á því, hvort svínaflensubóluefni frá breska lyfjaframleiðandanum GlaxoSmithKline kunni að hafa valdið svonefndri drómasýki í unglingum. Bóluefni frá þessum framleiðanda var einnig notað hér á landi.

Drómasýki er taugasjúkdómur sem veldur margskonar svefntruflunum. Sænska lyfjastofnunin segist í yfirlýsingu hafa fengið sex tilkynningar frá  heilbrigðisstarfsmönnum þar sem grunur leikur á að bólusetning með Pandemrix bóluefni hafi leitt til drómasýki.  Muni stofnunin láta rannsaka og meta hvort hugsanlega séu tengsl þarna á milli.

Um er að ræða börn á aldrinum 12-16, sem fengu sjúkdómseinkenni sem minna á drómasýki, 1-2 mánuðum eftir að þau voru bólusett við svínaflensu á síðasta ári. Sænska lyfjastofnunin segist vera í sambandi við aðildarríki Evrópusambandsins til að leita upplýsinga um hvort svipuð tilfelli hafi orðið þar.  

Í Finnlandi er einnig verið að rannsaka hvort tengsl kunni að vera milli bólusetningar gegn svínaflensu og drómasýki en slíkum tilfellum fjölgaði umtalsvert hjá börnum í vor. Búist er við að fyrstu niðurstöður liggi fyrir í lok ársins.

Um 30 milljónir manna voru bólusettir við svínaflensu með Pandemrix. Svíar keyptu 18 milljónir skammta sem átti að nægja til að bólusetja alla Svía, 9,3 milljónir talsins, tvívegis.  

2,5 milljónir Finna voru bólusettir við flensunni. Um 750 tilkynntu um aukaverkanir, svo sem hita, höfuðverk og hósta, og einnig var eitt tilfelli drómasýki tengt bólusetningunni.