Áin Yalu sem markar landamæri Kína og Norður-Kóreu flæðir nú yfir bakka sína eftir miklar rigningar síðustu daga og hafa rúmlega 50.000 Kínverjar þurft að yfirgefa heimili sín. Yfirvöld í Pyongyang vara við „skelfilegum afleiðingum"  í Norður-Kóreu.

Vatn hefur flætt inn á heimili beggja vegna landamæranna. Í borginni Dandong í norðvesturhluta Kína er þriggja saknað og 230 heimili hafa hrunið auk þess sem rafmagnslaust er og samgöngur í lamasessi.  Samgönguráðuneyti Kína segist hafa sent þyrlur á staðinn til að sækja um 90 íbúa á svæðinu sem voru innlyksa á húsþökum.

Yfirvöld í Dandong fullyrða engu að síður að ástandið sé „ekki alvarlegt" fyrir þær 2,4 milljónir sem búa í borginni. Hinum megin við landamærin segja kóreskir fjölmiðlar hinsvegar frá því að borgin Sinuiju í Norðrinu hafi orðið illa úti í flóðinu og bæði heimili, opinberar byggingar og ræktarland væri ónýtt.