Frá átökum í Mogadishu í síðustu viku Reuters

Liðsmenn Shebab uppreisnarhreyfingarinnar, sem er með náin tengsl við Al-Qaeda, hafa ráðist á hótel í nágrenni við forsetahöllina í Mogadishu, höfuðborg Sómalíu og myrt fjóra þingmenn. 

Í nótt sem leið gerðu uppreisnarmennirnir árás á forsetahöllina sjálfa en forsetinn, Sharif Sheikh, er staddur á friðarráðstefnu í Tyrklandi.

Samkvæmt heimildum BBC fréttastofunnar hafa 16 manns látið lífið í árásinni á Muna hótelið, til viðbótar við þá sem féllu í árásinni í nótt.

Meðal þeirra eru fjórir þingmenn, en hótelið er vinsælt meðal opinberra embættismanna þar sem öryggisgæsla er mikil þar.

Uppreisnarmennirnir dulbjuggu sig sem sómalska hermenn og komust þannig nærri hótelinu. Þá hófu þeir skothríð og ruddust inn þar sem einn mannanna sprengdi sig í loft upp.

Í átökunum sem hafa staðið frá því í gær hafa a.m.k. 40 manns látið lífið og yfir 130 særst. 

Það sem af er ári hafa hundruð almennra borgara látist í átökum í Sómalíu og þúsundir á síðustu þremur árum.

Framkvæmdastjóri Sameinuðu þjóðanna,  Ban Ki-moon, hvatti alþjóðasamfélagið til þess í gær að veita Sómalíu aðstoð vegna ástandsins þar í landi en stjórnmálaástandið hefur verið afar ótryggt í Sómalíu í tæp tuttugu ár.