Ólöglegum búðum sígauna lokað í Mons en Baroeul, skammt frá Lille Reuters

Frönsk stjórnvöld vísa hundruð sígauna úr landi í dag og voru þeir fluttir með langferðabílum á Charles de Gaulle flugvöllinn í París í morgun. Alls verða 283 sígaunar sendir til Rúmeníu í dag og verður flogið með þá frá París og Lyon.

Undanfarið hafa búðir sígauna og annarra flakkara verið jafnaðar við jörðu í Frakklandi og þeir sem hafa gerst brotlegir við lög sendir úr landi. Jafnframt hefur sígaunum sem fara af fúsum og frjálsum vilja verið greitt fyrir að yfirgefa landið.

Hefur brottvísun þeirra vakið mikla athygli víða um heim og hafa frönsk stjórnvöld verið sökuð um útlendingahatur, meðal annars af kaþólsku kirkjunni og stofnunar Sameinuðu þjóðanna sem berst gegn kynþáttahatri.

Í gær birtist grein eftir fjárfestinn George Soros í Morgunblaðinu þar sem hann segir  að sígaunar hafi verið ofsóttir um alla Evrópu svo öldum skiptir. „Nú sæta þeir mismunun, sem á ekki sinn líka í Evrópu frá síðari heimsstyrjöld: hópflutningar og brottrekstur karla, kvenna og barna frá nokkrum evrópskum lýðræðisríkjum á þeirri forsendu að þau séu ógn við lög og reglu."

Soros segir að það sé lögmætt viðfangsefni stjórnvalda að stöðva glæpsamlega hegðun. En brottrekstur ríkisborgara í Evrópusambandinu á grundvelli uppruna sem notaður er til marks um glæpsamlega hegðun er brot á tilskipunum ESB um mismunun á grundvelli kynþáttar og réttinn til að fara frjáls ferða sinna frá einu aðildarríki ESB til annars.

Er dómsmálaarmur framkvæmdastjórnar ESB nú að rannsaka hvort frönsk stjórnvöld hafi gengið of langt og brotið reglur ESB varðandi frjálst flæði á milli landa. 

Ráðherra innflytjendamála, Eric Besson, sagði í gær að 8 þúsund sígaunar hafi yfirgefið landið það sem af er ári, flestir af fúsum og frjálsum vilja.

Innanríkisráðherra Frakklands, Brice Hortefeux, segir að tölur bendi til þess að afbrotum sígauna í Frakklandi hafi fjölgað um 138% á milli ára.

þeir Besson og Hortefeux ræddu í gær við tvo aðstoðarráðherra Rúmeníu í París í gær. Eftir fundinn sendu ráðherrarnir fjórir frá sér sameiginlega yfirlýsingu um að samstarf ríkjanna varðandi málefni sígauna. 

Sígaunar koma til Sofiu höfuðborgar Búlgaríu í gær Reuters