Julian Assange stofnandi WikiLeaks ANDREW WINNING

Lögmaður tveggja kvenna sem segja að stofnandi WikiLeaks Julian Assange hafi beitt þær kynferðislegu ofbeldi staðfesti í dag í viðtali við AFP fréttaveituna að hann hefði áfrýjað þeirri niðurstöðu saksóknara um að málið yrði ekki rannsakað. Lögmaðurinn Claes Borgström sagðist hafa óskað eftir að sérstök deild innan saksóknaraembættisins endurskoðaði þá niðurstöðu.

Nauðgunarákæra var felld niður fyrr í vikunni, eftir að Eva Finne, saksóknari hafði dregið til baka handtökuskipun sem gefin var út um síðustu helgi á grundvelli þess að nýjar upplýsngar hefðu komið fram. Hins vegar væru til staðar upplýsingar sem gæfu tilefni til að halda áfram rannsókn á ásökunum um kynferðislegt ofbeldi af hálfu Assange

Borgstroem segir ljóst að hann og Finne hafi ekki sömu skoðun á málinu þrátt fyrir að hafa sömu gögnin. Hún hefði ekki rætt við konurnar eins og hann. Þær hafi sagt honum sömu hluti og þær sögðu lögreglu en hann komist hins vegar að annarri niðurstöðu en saksóknarinn.

Assange sem hefur hafnað ásökunum kvennanna hefur sagt að hann verði samvinnuþýður við sænsku lögregluna. Hann telur ákærurnar hluta af ófrægingarherferð sem eigi að rýra trúverðugleika uppljóstranasíðu sinnar WikiLeaks. Hann á í deilum við Pentagon vegna nær 77 þúsund bandarískra leyniskjala um stríðið í Afganistan sem birtar voru á síðunni og að innan tveggja vikna verði 15.000 skjöl í viðbót birt á síðunni.

Í viðtali við Aftonbladet í vikunni sagði Assange þetta mál hafa valdið WikiLeaks og sér sjálfum gífurlegum skaða.