Edgar Valdez, sem handtekinn var af lögreglunni í Mexíkó í gær, er þekktur fyrir annað en góðmennsku enda tengdur eina helstu glæpagengi landsins, Beltran Leyva. Samkvæmt upplýsingum frá lögreglu veitti Valdez litla mótspyrnu við handtökuna.

Valdez, sem er 37 ára gamall og bandarískur ríkisborgari fæddur í Texas, er einnig þekktur undir heitinu Barbie, vegna þess hve ljós hann er yfirlitum.

Hann er talinn hafa stýrt hluta Beltran Leyva glæpahringsins en undanfarna mánuði hefur hann reynt að ná yfirráðum yfir glæpagenginu og er með náin tengsl við glæpahópa bæði í Mið- og Suður-Ameríku, samkvæmt frétt BBC.

Í Bandaríkjunum er Valdez ákærður fyrir dreifingu á þúsundum kílóa af kókaíni á árunum 2004-2006 á austurströnd Bandaríkjanna. Höfðu bandarísk stjórnvöld heitið því að greiða 2 milljónir dala hverjum þeim sem veitt gæti upplýsingar sem myndu leiða til handtöku hans.

Fyrr í mánuðinum fann lögregla höfuðlaus lík hangandi fram af brúarhandriði í borginni Cuernavac.  Skammt frá fundust höfuð hinna látnu með þeim skilaboðum að þeir sem myndu styðj Valdez biðu sömu örlög.

Fyrir nokkrum vikum skutu sérsveitarmenn Ignacio „Nacho" Coronel til bana en hann var einn helsti yfirmaður Sinaloa eiturlyfjahringsins. Var hann talinn vera hægri hönd  Joaquin „Shorty" Guzman sem lögregla segir vera þann glæpamann sem helst er leitað.