Barack Obama, forseti Bandaríkjanna, sagði í dag að yfirvöld alríkisins og einstakra ríkja búi sig undir „hið versta“ en fellibylurinn Earl stefnir nú hraðbyri að austurströnd Bandaríkjanna. Líkur eru á að óveðrið gangi yfir land á næstu tveimur sólarhringum.

Vefurinn nj.com telur að New Jersey sleppi við óveðrið en að íbúar Massachusetts og Norður-Karolínu verði ekki jafn heppnir. Síðan gæti leið fellibylsins legið yfir austurhluta Kanada, þ.e. Nova Scotia og Nýfundnaland.

Obama ræddi við yfirmenn almannavarnamála í síma í dag. Hann sagði að embættismenn búi sig undir „allt sem getur gerst, þar á meðal að hið versta geti brostið á og þeir gera allt sem þarf til að verja íbúa og byggðarlög á austurströndinni.“

Stórar öldur brotnuðu á ströndum Bahamaeyja þegar fellibylurinn Earl stefndi í átt að austurströnd Bandaríkjanna. Fellibylurinn sem hafði styrk sem mældist á fjórða stigi olli úrhellisrigningu og tafði flug frá Bahama eyjum. 

Veðurfræðingar spá því að fellibylurinn gangi norður með austurströnd Bandaríkjanna, allt frá Norður Karólínu og til Nýja Englands. Talið er að miðja fellibylsins fari yfir hafið og versta veðrið verði úti á sjó. Óveðrið sem er í aðsigi veldur þó ýmsum ugg.

„Jamm, ég er svolítið órólegur, en þú veist, maður verður að taka þessu, sjá hvað gerist,“ sagði ferðamaðurinn Matt Trove. Þótt Earl hafi haldi sig yfir hafinu getur hann breytt um stefnu og gengið á land. Embættismenn vara við því að grípa þurfi til rýmingar ákveðinna svæða og að fólk verði að fylgjast með gangi óveðursins.

„Það er mikilvægt að fólk fylgist með gangi stormsins, sé undirbúið og tilbúið og sveigjanlegt,“ sagði Graig Fugate, stjórnandi FEMA. Viðkvæmustu svæðin hafa þegar verið rýmd. Reiknað er með að fellibylurinn bresti á á austurströndinni á morgun og að vindhraðinn verði þá um 33 m/s.