Tony Blair, fyrrverandi forsætisráðherra Bretlands, segir í endurminningum sínum, sem koma út í dag, að hann hafi gert sér grein fyrir því að Gordon Brown yrði vonlaus forsætisráðherra og að Verkamannaflokkurinn gæti ekki sigrað í þingkosningunum, sem fóru fram í vor. 

Fram kemur í blaðinu Guardian í dag, að í endurminningunum skrifi Blair að Brown sé gersneiddur tilfinningagreind og hann hafi einnig horfið frá þeirri stefnu, sem hinn svonefndi Nýi Verkamannaflokkur byggði á. 

Í bókinni kemur skýrt í ljós, að sögn Guardian, að átökin milli Blair og Brown drógu kraft úr ríkisstjórn Verkamannaflokksins og leiddu einnig til þess, að Blair sat lengur í embætti forsætisráðherra en upphaflega var áformað.

Blair segir hins vegar, að það það hefðu verið mistök að víkja Brown úr embætti fjármálaráðherra eða koma í veg fyrir að hann yrði leiðtogi Verkamannaflokksins. „Þegar hann er upp á sitt besta eru gáfur hans og orka gríðarleg og til hagsbóta fyrir landið," skrifar Blair.