Frá Schiphol flugvelli í Amsterdam. STR

Jemenunum tveimur sem handteknir voru á Schiphol flugvelli í Amsterdam vegna grunsemda um fyrirhuguð hryðjuverk var sleppt í gærkvöldi. Rannsókn leiddi ekki fram neina sönnun þess að mennirnir hefðu hryðjuverkaárás á prjónunum að sögn saksóknara.

Mennirnir voru handteknir á mánudag að beiðni bandarískra yfirvalda við komuna á flugvöllinn frá Chicago.Yfirvöld í Bandaríkjunum segja nú ekki telja að þeir hafi skipulagt hryðjuverkaárás. Mennirnir voru á leið til Sanaa, höfuðborgar Jemen þegar þeir voru handteknir um borð í vél United Airlines. Þeir sátu ekki saman í vélinni.

Mennirnir höfðu skráð farangur inn í innanlandsflug frá Chicago til Washington Bandaríkjunum sem þeir tóku síðan ekki. Yfirvöld segja að svo virðist vera sem þeir hafi misst af flugvélinni og því fengið breytta flugáætlun með millilendingu í Amsterdam. Yfirvöld telja að mennirnir þekkist ekki og hafi ekki verið saman á ferðalagi.  Annar maðurinn hafði í fórum sínum 7.000 Bandaríkjadali í reiðufé og farsíma sem límdir höfðu verið saman við lyfjaglas sem þótti grunsamlegt.

Tollayfirvöld segja hinsvegar ekki óalgengt að fólk sem ferðist til landa eins og Jemen taki með sér háar upphæðir í reiðufé og lími saman verðmæti til að týna þeim síður.