Húmorslaus? Sarkozy og Bruni á góðri stundu. Reuters

Franski háðfuglinn Stéphane Guillon var látinn taka poka sinn eftir að hann hafði um hríð dregið frönsku yfirstéttina, að Nicolas Sarkozy forseta meðtöldum, sundur og saman í háði í útvarpsþætti sínum. Þúsundir manna mótmæltu brottrekstrinum og varð Guillon hetja í augum margra hlustenda sinna.

Fjallað er um málið á vef Wall Street Journal en þar segir að útvarpsstöðin, France Inter, sé rekin fyrir almannafé.

Philippe Val, útvarpsstjóri France Inter, kveðst hafa umborið háðið af miklu þolgæði en svo fór að lokum að hann varð að skotspóni Guillons.

Virðist það hafa verið kornið sem fyllti mælin því Guillon var sparkað í kjölfarið.

Blaðið segir franska háðfugla lengi hafa haft skotleyfi á yfirstéttina en að þeir hafi síðan fært sig upp á skaftið með kjöri Sarkozys, enda hafi hann veitt fjölmiðlum meiri aðgang að einkaleyfi sínu en fyrri forsetar.

Er jafnframt rifjað upp að þegar Sarkozy hafi fyrst sést með konu sinni Cörlu Bruni í Disney-skemmtigarðinum í París hafi grínisti orðað það svo að nýtt skemmtiatriði, Mjallhvít giftist dvergnum, litið dagsins ljós.

En Sarkozy er með lágvaxnari leiðtogum.

Það hefur líklega orðið Guillon að falli að Sarkozy er yfirmaður Radio France, móðurstöðvar France Inter.

Það er þó aðdáendum Guillon til huggunar að hann vinnur að bók um málið.

Verður að teljast ólíklegt að hún verði undir jólatrénu hjá Sarkozy-hjónunum í ár.

Guillon.