Mohamed ElBaradei, fyrrverandi yfirmaður Alþjóðakjarnorkustofnunarinnar, IAEA, sakar stjórnvöld í heimalandi sínu, Egyptalandi, um að standa á bak við ófrægingarherferð  sem beinist gegn ElBaradei og fjölskyldu hans. Í dagblaði sem er gefið út af stjórnvöldum kemur fram að ElBaradei sé trúleysingi og dóttir hans ætli að giftast manni sem ekki er múslími.

ElBaradei segir að þetta sé herbragð af hálfu stjórnvalda til þess að koma í veg fyrir umbætur í landinu. Hann hefur verið nefndur sem mögulegur forsetaframbjóðandi í landinu en Egyptar fögnuðu honum eins og þjóðhetju er ElBaradei flutti heim á ný fyrr á árinu en hann lét af störfum hjá IAEA í fyrra.

Hosni Mubarak hefur verið forseti frá árinu 1981 og lýkur fimmta kjörtímabili hans á næsta ári. Hann er 82 ára að aldri og hefur enn ekki gefið upp hvað hann hyggst fyrir, en margt þykir benda til þess að hann sé að búa yngri son sinn, Gamal, undir að taka við af sér. Framboð ElBaradeis myndi setja strik í reikninginn hjá Mubarak.

ElBaradei gagnrýnir árásir á fjölskylduna harðlega í viðtali við dagblaðið  Al-Dustour en blaðið er frjálst og óháð. Segir hann þetta sýna svart á hvítu hvernig núverandi stjórnvöld berjist gegn breytingum í landinu. 

Talsmaður stjórnmálaflokks Mubarak segir ljóst að hvorki forsetinn né flokksfélagar hans eigi sök á því að hafa dreift óhróðri um ElBaradei og fjölskyldu hans, að því er segir í frétt á vef BBC.