Mark Rolfe, stjórnmálafræðingur við University of New South Wales í Ástralíu, telur 60% líkur á Julia Gillard, nýbakaður forsætisráðherra landsins, haldi stjórninni saman út kjörtímabilið. Gillard tókst að mynda stjórn með tveimur óháðum þingmönnum og þingmanni Græna flokksins.

Metur Rolfe stöðuna svo að Tony Abbot, leiðtogi Íhaldsflokksins og stjórnarandstöðunnar, eigi að sama skapi 40% möguleika á að veikja stjórnina á kjörtímabilinu og grafa þannig undan naumum meirihlutanum. 

Abbot fór nærri því að velta jafnaðarmönnum úr stjórnarstólunum en efnt var til þingkosninga í ágúst eftir að Gillard ýtti Kevin Rudd úr stóli forsætisráðherra og leiðtoga Verkamannaflokksins.

Aðeins nokkrum vikum síðar leitaði hún eftir endurnýjuðu umboði stjórnarinnar og urðu úrslitin þau að jafnaðarmenn náðu ekki meirihluta, eða 76 sætum, í neðri deild þingsins í Canberra. Þurftu þeir þrjá þingmenn til eins og áður segir.

Eftir mikið baktjaldamakk tókst Gillard að mynda stjórn og er hún þar með fyrsta konan sem er forsætisráðherra Ástralíu eftir kosningar en hún hafði gegnt embættinu í nokkrar vikur er andfætlingar gengu að kjörborðinu.