Julian Assange Reuters

Julian Assange stofnandi WikiLeak neitar að stíga til hliðar á meðan rannsakaðar eru kærur á hendur honum í Svíþjóð, ef marka má vef Fox sjónvarpsstöðvarinnar. Vísar vefurinn til þess að Birgitta Jónsdóttir hafi hvatt til þess að Assagne myndi víkja á meðan rannsóknin stendur yfir sem og hópur sem ekki kemur undir nafni en skilgreinir sig sem innherja WikiLeaks.

Segja innherjarnir að einstaklingurinn Julian Assange skyggi á verkefni vefjarins og því eigi hann að víkja.

Í viðtali við NexNews.com segir Assange ljóst að hann muni ekki láta af störfum. Jafnframt segir hann að tengsl Birgittu við WikiLeaks kunni að vera orðum aukin.

„Birgitta Jónsdóttir er ekki skipuleggjandi WikiLeaks," segir Assange. „Ég hef ekki talað við hana mánuðum saman og talaði í fyrsta skipti við hana seint á árinu 2009. Hún er stjórnmálamaður í fullri vinnu og einstæð móðir á Íslandi."

WikiLeaks innherjarnir svonefndu hafa allt frá því í júní verið harðir í afstöðu sinni gegn Assagne í skilaboðum sem þeir hafa sett inn á Cryptome, annan sambærilegan vef og WikiLeaks. Samkvæmt Fox er sá vefur í samkeppni við WikiLeaks. Á mánudag tóku þeir undir gagnrýni Birgittu og töldu hana eiga að taka við sem leiðtogi WikiLeaks.

Assagne hrekur í viðtali við Fox ásakanir innherjanna lið fyrir lið. Til dæmis það að hann búi í lúxusíbúð í Suður-Afríku fyrir peninga sem safnað hefur verið fyrir vefinn. Hann hafi aldrei komið til S-Afríku og fljúgi um á almennu farrými ekki því fyrsta líkt og innherjarnir halda fram. 

Umfjöllun Fox í heild