Fjölskyldumeðlimir þeirra sem létust í hryðjuverkaárásunum á tvíburaturnana í New York búa sig í dag undir að minnast þeirra í dag, 9 árum síðar. Margir óttast að deilur vegna íslamskrar menningarmiðstöðvar í nágrenninu muni varpa skugga á minningarathöfnina. 

Tæplega 3.000 manns létust þann 11. september 2001 þegar flugræningjar al-Qaeda stýrðu farþegaflugvélum á World Trade Center og  Pentagon auk einnar vélar sem hrapaði á engi í Pennsylvaníu. Á meðal þeirra sem dóu var hinn 26 ára gamli James Cartier sem var við vinnu sem rafvirki á 105. hæð í syðri turninum þegar flugvélarnar skullu á turnunum. Bróðir hann John, stofnaði í kjölfarið mótorhjólaklúbbinn Bandaríska bræðrafélagið MC, til að heiðra helsta áhugamál bróður síns. Sjálfur lifði hann árásirnar af, en hann var staddur fyrir framan tvíburaturnanna ásamt systur þeirra bræðra þegar þeir hrundu. Hann segir systkinin hafa komið nær daglega að rústunum í 7 mánuði á eftir í von um að finna bróður sinn. 

Fjölskyldur hinna látnu safnast saman á hverju ári við Ground Zero þar sem minningarathöfn fer fram. Boðað hefur verið að eftir minningarathöfnina í dag verði mótmæli gegn fyrirhugaðri byggingu íslamskrar menningarmiðstöðvar í nágrenninu. Stuðningsmenn byggingarinnar hafa einnig boðað nærveru sína.