Benedikt páfi, sem er nú staddur í Bretlandi, átti í dag fund með fólki sem hefur orðið fyrir kynferðislegu ofbeldi af hálfu kaþólskra presta. Páfagarður greindi frá þessu og sagði að fundurinn hefði farið fram í sendiráði Páfagarðs í Lundúnum.

Þá segir að páfi hafi orðið djúpt snortinn yfir því sem fólkið hafði að segja. Hann vottaði fórnarlömbunum og fjölskyldum þeirra samúð.

„Hann bað með þeim og fullvissaði þau um að kaþólska kirkjan héldi áfram að vinna að því að setja á laggirnar áhrifaríkar aðferðir til að vernda unga einstaklinga, og að hún sé að gera allt sem í hennar valdi stendur til að rannsaka meint brot. Hún starfi með borgaralegum yfirvöldum að því að sækja þá presta og kirkjunnar þjóna til saka sem hafa framið þessa skelfilegu glæpi,“ segir í yfirlýsingu Páfagarðs.

Fyrr í dag stýrði Benedikt páfi messu í Westminster dómkirkjunni þar sem hann bað fórnarlömb kynferðisofbeldis innan kaþólsku kirkjunnar afsökunar í dag.