Verena Becker var með sólgleraugu í réttarsalnum.

Réttarhöld eru hafin yfir Verena Becker sem er sökuð um aðild að morði sem liðsmenn í Baader-Meinhof skæruliðahópnum frömdu árið 1977. Becker neitaði að tjá sig um ásakanirnar á fyrsta degi réttarhaldanna.

Baader-Meinhof eða Rauðu herdeildirnar eru talin bera ábyrgð á 34 morðum í Þýskalandi á áttunda áratugnum, auk fjölda sprengjutilræða.

Verena Becker er ákærða fyrir að hafa tekið þátt í morðinu á Siegfried Buback saksóknara og bílstjóra hans fyrir 33 árum. Þeir voru skotnir til bana þegar menn á mótorhjólum óku upp að bíl þeirra þar sem þeir biðu á umferðarljósum í borginni Karlsruhe. Þeir voru skotnir til bana með sjálfvirkri hríðskotabyssu. Þriðji maðurinn sem var í bílnum lést af sárum sínum nokkrum dögum síðar.

Rannsókn á málinu lauk árið 1980, en hóst á ný fyrir tveimur árum þegar lífssýni úr Becker fannst á bréfi þar sem Rauðu herdeildirnar lýsa morðinu á hendur sér.

Becker er 58 ára gömul, ógift og barnlaus. Hún var handtekin í fyrra og gefin var út ákæra sl. vor. Hún er ekki ákærð fyrir að hafa skotið Buback heldur fyrir að hafa aðstoðað við að skipuleggja tilræðið. Sonur Buback segist hins vegar vera 99% viss að Becker er sú sem drap föður hans. Hann segir að um 20 vitni hafi séð konu á mótorhjólinu með byssuna.

Í fréttum í þýskum fjölmiðlum segir að Becker neiti aðild að málinu. Hún hafi raunar fullyrt að annar maður,  Stefan Wisniewski, hafi skotið Buback.

Becker var dæmdi í lífstíðarfangelsi árið 1977 fyrir annað morð, en var sleppt lausri árið 1989. Hún lærði sjúkraþjálfun eftir að henni var sleppt lausri, en fór snemma á eftirlaun vegna veikinda.

Búist er við að niðurstaða dómstólsins liggi fyrir í desember.