Margir Þjóðverjar eru mjög neikvæðir gagnvart samfélagi múslíma í landinu, ef marka má niðurstöður könnunarinnar. Reuters

Meirihluti Þjóðverja er þeirrar skoðunar að múslímar búsettir í Þýskalandi séu efnahagsleg byrði. Þetta kemur fram í nýrri skoðanakönnun  Rúmlega fjórar milljónir múslíma búa nú í Þýskalandi, eða um það bil 5% landsmanna.

Allensbach stofnunin framkvæmdi könnunina fyrir þýsku útgáfu Financial Times. Fram kemur að 55% Þjóðverja telji að kostnaðurinn sem fylgi múslímum, í félagslegum og efnahagslegum skilningi,  sé mun hærri en nemur því sem þeir framleiða og leggja af mörkum til þýska þjóðarbúsins.

Aðeins einn af hverjum fimm Þjóðverjum eru á öndverðum meiði.

Skv. skoðanakönnuninni mældist andúðin gagnvart samfélagi múslíma mest í Austur-Þýskalandi, á svæðum þar sem efnahagslífið stendur á veikum stoðum og atvinnuleysi mikið. Þar voru 74% aðspurðra neikvæðir gagnvart múslímum.

Undanfarnar vikur hefur staðið yfir mikil umræða um innflytjendamál yfir í Þýskalandi. Hún hófst af krafti í kjölfar ummæla sem Thilo Sarrazin, sem sat í bankaráði þýska seðlabankans, lét falla. En hann sagði að illa menntaðir múslímskir innflytjendur sem afkasti litlu séu þess valdandi að þýska þjóðin sé að verða heimskari.

Skv. könnunninni er meirihluti Þjóðverja á sama máli, en 60% þeirra segjast vera sammála fullyrðingu hans. 13% eru hins vegar ósammála.

Sarrazin sagði af sér í framhaldinu, en menn óttast nú að hægri öfgaflokkar muni nú sækja í sig veðrið. 

Thilo Sarrazin sagði af sér eftir að hafa látið ummælin falla. Reuters