Tveir bandarískir námsmenn hafa verið ákærðir fyrir að taka í leyni myndir af 18 ára pilti hafa kynmök við mann og sýna þær á netinu. Pilturinn stökk af brú í fljót nálægt háskólanum þar sem hann stundaði nám. Talið er að hann sé látinn.

Veski í eigu Tyler Clementi fannst við George Washington brú í New Jersey þann 22. september sl. og segja tvö vitni að þau hafi séð mann stökkva í ána. Lík Clement hefur ekki fundist.

Þetta mál hefur vakið upp umræður um einelti á netinu og um stöðu samkynhneigðra í Bandaríkjunum. 

„Tyler var einstakur maður og hæfileikaríkur tónlistarmaður. Fjölskylda hans er harmi lostinn,“ sagði lögmaður fjölskyldunnar í yfirlýsingu sem var send fjölmiðlum.

Tveir herbergisfélagar Clementi við háskólann settu upp myndavélar í herberginu og sendu út myndir af honum eiga kynmök við annan mann. Meðal gagna í málinu gegn þeim eru samskipti á Twitter-síðu þar sem annar pilturinn segir að herbergisfélagi sinn hafi beðið sig um herbergið í kvöld. „Ég fór inn í mitt herbergi og kveikti á vefmyndavélinni. Ég sá hann gera'ða með gaurnum,“ segir í annarri færslunni. Síðar sagði hann í annarri færslu að hann skori á fólk að fylgjast með því „það hafi gerst aftur.“

Námsmennirnir sem hafa verið ákærðir mega búast við allt að fimm ára fangelsi verði þeir fundnir sekir.