Julian Assange. Reuters

Julian Assange, stofnandi uppljóstrunarvefjarins WikiLeaks, segir að bandaríska varnarmálaráðuneytið, Pentagon, sé staðráðið í að eyðileggja vefinn. Segir hann að ráðuneytið krefjist þess að WikiLeaks eyði öllum gögnum, sem þar hafi verið birt.

Pentago hefur gagnrýnt WikiLeaks harðlega fyrir að birta um 77 þúsund skjöl sem tengjast hernaðaraðgerðum Bandaríkjamanna í Afganistan og segir að það hafi stofnað lífi óbreyttra borgara í landinu í hættu.

„Ég verð að lýsa því hve þessi árás á fjölmiðil er alvarleg," sagði Assange á fundi í Lundunum í gærkvöldi. „Pentagon hefur krafist þess... að við eyðum fyrri gögnum, þar á meðal gögnunum um Afganistan. Pentagon er að reyna að byggja upp njósnamál og eyðileggja samtök okkar," sagði Assange.

Hann vísaði á bug fréttum um að fulltrúi WikiLeaks í Þýskalandi hefði verið rekinn vegna þess að hann gagnrýndi það hvernig vefsíðunni er stjórnað.  

Daniel Schmitt sagði þýska fréttatímaritinu Der Spiegel um síðustu helgi, að Assange hefði einn tekið þá ákvörðun að reka hann eftir að hafa sakað hann um óheilindi og óhlýðni. 

Assange sagði að þetta væru hreinar lygar.  „Honum var vikið úr starfi fyrir mánuðum af öðrum ástæðum," sagði Assange en tjáði sig ekki frekar um málið.

Assange hefur að undanförnu dvalið í Svíþjóð og þar var hann nýlega ásakaður um nauðgun. Hann sagði í gærkvöldi, að þær ásakanir væru hluti af ófrægingarherferð, sem hefði það markmið að draga úr trúverðugleika WikiLeaks.