Búrka. Reuters

Stjórnlagadómstóll  Frakklands, sem er æðsta stig dómsvalds í Frakklandi, samþykkti í dag bann við blæjum sem hylja allt andlitið á opinberum svæðum. Talsverðar deilur hafa verið meðal Frakka um blæjubannið en það var samþykkt með miklum meirihluta á þingi.

Áður hafði stjórnlagadómstóllinn  varað við því að bannið gæti brotið í bága við stjórnarskrár. Frumvarpið hefur hins vegar tekið breytingum frá þeim tíma og samþykkti ráðið í dag það frumvarp sem var samþykkt í báðum deildum þingsins.

Eftir sem áður verður leyft að ganga með slæðu yfir hárið, eingöngu er lagt bann við umfangsmeiri slæðum er nefnast nítsjab og kufli er nefnist búrka, hann hylur allan líkamann og er m.a. algengur í Afganistan.

Í frétt sem birtist í Morgunblaðinu í sumar kom fram að ýmsum rökum hafi verið beitt gegn slæðunum, fyrst og fremst er þó nefnt að með slæðuburðinum séu múslímakonur að láta undan þvingunum og hótunum ofstækisfullra íslamista sem vilji að múslímakonur haldi sig ávallt til hlés og haldi fast við forneskjulega siði.

Kynjunum sé mismunað, karlar þurfi ekki að bera neinar slæður. Einnig sé ljóst að hryðjuverkamenn geti falið sig innan um óbreytta borgara með tól sín undir slæðum og búrkum. Aðrir segja að margar múslímakonur vilji sjálfar hylla forna menningu sína með slæðuburðinum, fatnaðurinn sé oft tákn um sjálfsvitund þeirra.

Hugtakið opinberir staðir er skilgreint vítt í lögunum, átt er við opinberar byggingar og almenningsfarartæki, götur, markaðstorg, einkafyrirtæki og skemmtistaði.

Skoðanakannanir hafa leitt í ljós að þorri kjósenda í Frakklandi styður bannið og það gerir einnig forseti landsins, Nicolas Sarkozy. En andstæðingar bannsins benda á að aðeins örlítill minnihluti múslímakvenna í Frakklandi gangi með slæður sem hylji allt andlitið.