Íbúar ungverska þorpsins Kolontar í nágrenni súrálsverksmiðju þar sem mikið eiturefnaslys varð í síðustu viku hefur verið gert að yfirgefa heimili sín af ótta við frekari útbreiðslu mengunarinnar. Sjö manns biðu bana í eiturefnaslysinu og um 150 slösuðust þegar geymsluþró gaf sig.

Viktor Orban, forsætisráðherra Ungverjalands, greindi frá því í morgun að óttast sé að stífluveggur sem heldur eftir af eitraðri leðju muni gefa sig og hún dreifast um stórt svæði við bæinn Kolontar.

Bæirnir Kolontar og Devecser urðu harðast úti er 700.000 rúmmetrar af leðju dreifðust yfir stór svæði eftir slys í súrálsverksmiðjunni í Ajka.

Íbúar bæjarins Kolontar eru um 800 og voru þeir fluttir til Ajka sem er í um 8 km fjarlægð. Verður fólkinu boðið að dvelja í íþróttahöll og tveimur skólum á meðan unnið er að því að finna því húsnæði.

Herwit Schuster, talsmaður umhverfisverndarsamtakanna Greenpeace, segir þetta „eitt af þremur mestu umhverfisslysum í Evrópu á síðustu 20 eða 30 árum“.