Serbneskum lögreglusveitum sló í dag saman við hópa mótmælenda sem trufluðu Gay Pride göngu í höfuðborginni Belgrad. Óeirðaseggir köstuðu bensínsprengjum og grjóti að vopnuðum lögreglumönnum og reyndu að brjótast í gegnum öryggishlið, en lögregla beitti þá táragasi.

Að sögn Reuters voru yfir 5.000 lögreglumenn á götunum til að stöðva óeirðaseggina. Að minnsta kosti tveir þeirra særðust í átökunum, auk um 40 mótmælenda. Fjöldi manns var handtekinn.

Þetta er fyrsta gay Pride gangan sem haldin er í Serbíu síðan í mars 2001, en þá brutust út blóðug átök sem öfga hægrisinnar kynntu undir. Á meðan samkynhneigðir og stuðningsmenn réttinda þeirra gengu um borgina öskruðu nokkur hundruð mótmælenda að þeim óhróðursorð og morðhótanir. Lögreglan setti upp öryggisgirðingar og barðist við að halda óeirðarseggjum í skefjum svo gangan gæti farið fram.

Í gær söfnuðust nokkur þúsund manns saman í miðborginni til að mótmæla því að gangan yrði haldin. Samtök öfga hægrimanna segja að samkynhneigð stríði gegn fjölskyldugildum og trú Serba. Serbneska rétttrúnaðarkirkjan fordæmdi gönguna á föstudag en varaði jafnframt við því að gripið yrði til ofbeldisaðgerða.

Margir litu á Gay Pride gönguna á prófstein á það hversu langt serbneska þjóðin hefur náð í að skilja sig frá þjóðernisstefnu og ofbeldis 10. áratugarins á þeirri vegferð að sameinast Evrópusambandinu. Formaður samninganefndar ESB í Serbíu ávarpaði samkynhneigða fyrir gleðigönguna og sagði hana vera hátíð umburðarlyndis og tjáningarfrelsis.