Séð yfir súrálsverksmiðjuna í Ajka Reuters

Lögreglan hefur handtekið forstjóra súrálsverksmiðjunnar þar sem eiturleðja flæddu út í Ungverjalandi fyrir viku síðan. Að sögn forsætisráðherra Ungverjalands, Viktor Orban, er verið að yfirheyra forstjórann, Zoltan Bakonyi.

BBC hefur eftir Orban að álfyrirtækið verði tekið tímabundið yfir af stjórnvöldum og þeir sem beri ábyrgð á umhverfisslysinu verði látnir bera fjárhagslegar byrðar vegna þess.

Að minnsta kosti sjö létust og um 150 manns þurftu að leita til læknis eftir eiturleðjuflóðið. Í bænum Kolontar, en sá bær fór einna verst út úr flóðinu, þurftu allir íbúarnir að yfirgefa heimili sín og mega ekki snúa heim á meðan enn er hætta fyrir hendi. 

Eiturefnaleðjan flæddi úr geymsluþró súrálsverksmiðju í bænum Ajka á mánudag. Áætlað er að um 700.000 til 1,1 milljón rúmmetrar af rauðri leðju hafi flætt úr þrónni yfir stórt svæði í grenndinni, m.a. tugi bæja og þorpa.

Leðjan myndast þegar súrál er unnið úr báxíti. Málmgrýtið er þá tekið úr jörðinni og hreinsað með vítissóda. Úr því verður til súrál, sem er unnið frekar, og úrgangur, þ.e. óhreinindi í föstu formi, þungmálmar og efni sem notuð eru við vinnsluna, að sögn fréttavefjar BBC.

Um það bil 40-45% úrgangsins eru járnoxíð sem gefur leðjunni rauðan lit. Um 10-15% eru áloxíð, önnur 10-15% kísiloxíð og í leðjunni er minna magn af brenndu kalki, títandíoxíði og natrínoxíði, að sögn fyrirtækisins sem rekur súrálsverksmiðjuna.

Auk þess sem eiturefnin geta valdið brunasárum geta þau skemmt lungun og meltingarfæri ef þau berast inn í líkamann.