Knattspyrnusamband Evrópu, UEFA, hefur fyrirskipað rannsókn á atburðunum sem leiddu til þess að flauta þurfti af leik Ítalíu og Serbíu í undankeppni EM í knattspyrnu í gær.
Í tilkynningu sem sambandið sendi frá sér segir að aganefnd muni funda um málið 28.október næstkomandi. Samkvæmt reglugerðum sambandsins gæti serbneska landsliðið átt yfir höfði sér sekt vegna málsins og jafnvel brottrekstur úr keppninni.

Leikurinn í gær var flautaður af eftir einungis sex mínútna spil þar sem
serbneskir áhorfendur létu öllu illum látum í stúkunni. Þeir kveiktu í flugeldum og köstuðu blysum inn á völlinn sem og í átt að ítölskum stuðningsmönnum. Ítalska óeirðalögreglan fylgdi fótboltabullunum af leikvangi sem héldu áfram að láta illa á götum úti. Lögreglan hafði upp á hvatamanni óeirðanna þar sem hann hafði komið sér fyrir í farangursgeymslu áætlunarbíls. Á honum fundust sprengifim efni. 

Sautján voru handteknir eftir óeirðirnar og fjórtán fluttir á sjúkrahús til aðhlynningar.

Fjölmiðlar segja ítölsku þjóðina slegna vegna atburðanna.