Kínverski Kommúnistaflokkurinn fundar nú í höfuðborginni Peking þar sem flokksmenn skipuleggja efnahagsstefnuna til næstu fimm ára. Dagskráin er leynileg en fréttaskýrendur segja að í stað þess að leggja áherslu á mikinn hagvöxt leggi flokkurinn nú áherslu á að minnka bilið á milli ríkra og fátækra.

Sömuleiðis vilji flokkurinn grynnka bilið sem sé á milli strandhéraða og innsveita.

Þá segir á vef breska útvarpsins að fréttaskýrendur muni fylgjast grannt með því hver verði útnefndur næsti leiðtogi Kína, en hann mun taka formlega við völdum 2012.

Talið er mögulegt að flokksmenn muni ræða pólitískar umbætur á landsfundinum, en nýverið kallaði Wen Jiabao, forsætisráðherra Kína, eftir opnari umræðu.

Fyrr í þessum mánuði sagði hann í samtali við CNN að ekki verði hægt til að standast áköll um lýðræði og frelsi í Kína. „Án pólitískra umbóta þá mun Kína mögulega glata því sem þegar hefur áunnist með efnahagslegri endurskipulagningu.“

 Fyrr í þessari viku skrifuðu 23 öldungar í Kommúnistaflokknum bréf þar sem hvatt er til þess að málfrelsi einstaklinga verði í virt. Þar segir að ritskoðun stjórnvalda sé hneyksli og til skammar. Bréfinu var dreift nokkrum dögum eftir að tilkynnt var að kínverski andófsmaðurinn Liu Xiaobo myndi hljóta friðarverðlaun Nóbels.

Nú hafa um 100 aðgerðarsinnar í Kína undirritað bænaskjal þar sem þess er krafist að Liu verði leystur úr haldi.

Fréttaskýrendur segja að stjórnvöld vilji minnka bilið á milli ríkra og fátækra í Kína. Reuters