Farþegi gengur hjá hraðlest frá Deutsche Bahn. MICHAELA REHLE

Í dag var prufukeyrð ný hraðlest sem vonast er til að muni tengja Bretland og Þýskaland fyrir árslok 2013. Lestin er rekin af þýska járnbrautarkerfinu, Deutsche Bahn. Hún ferðast á um 320 km hraða á klukkustund og ber nafnið Inter City Express (ICE3). Vonast er til þess að leiðin opni nýjan markað í ferðalögum og bjóði upp á samkeppni við bæði Eurostar lestirnar og flugfélög.

Ætlunin er að lestin ferðist á milli Frankfurt og London, hugsanlega með viðkomu í Köln og Brussel. Með tilkomu hennar munu lestarferðalög á milli Bretlands og meginlands Evrópu aukast um 10% gangi þær áætlanir eftir að farþegafjöldi verði a.m.k. ein milljón á ári.

Að sögn Guardian er mikil áhersla er lögð á að lestin verði samkeppnishæf við flugvélar og því talið lykilatriði að ferðin, milli þessa tveggja stærstu fjármálamiðstöðva í Evrópu, taki að hámarki 4 klukkustundir.  Markhópurinn er ekki síst viðskiptafólk sem þarf að ferðast mikið á milli borganna og vonast yfirmenn Deutsche Bahn til þess að lestarleiðin verði valin framyfir flug, enda fylgi því minna umstang að vera laus við öryggishlið flugvalla.

Lestarferðir um Ermasundið frá London til Parísar og Brussel hafa gengið afar vel síðan Eurostar kynnti þær til sögunnar árið 1994. Eurostar hefur um þriðjungs markaðshlutdeild á þeim leiðum til móts við flugfélög og flytur 9 milljónir farþega á ári.