Herman Van Rompuy. FARID ALOUACHE

Evrópusambandið mun styðja Bosníu til inngöngu í Evrópusambandið sem sameinað land, sem getur talað einni röddu. Þetta sagði Herman Van Rompuy, forseti ESB-leiðtogaráðsins, í opinberri heimsókn sinni til Sarajevó í dag.

Skilaboðin frá Van Rompuy koma í kjölfar kosninganna þann 3. október síðastliðinn,  þar sem niðurstöður voru þær að Króatar og múslímar í landinu sneru baki við þjóðernishyggju, á meðan aðskilnaðarstefnunni óx fiskur um hrygg í serbneska hlutanum. Niðurstöðurnar þykja varpa skugga á markmið Bosníu um inngöngu í ESB.

Van Rompuy ítrekaði að Evrópusambandið styðji Bosníu-Hersegóvínu sem sjálfstætt og sameinað land. Hann kallaði eftir því að leiðtogar landsins hröðuðu endurbætum sem staðið hafa fastar í kerfinu í nokkur ár. „Framfarir í Bosníu ganga hægar en við vonuðumst öll eftir,"  sagði hann við fjölmiðla og bætti við að Júgóslavíulýðveldið fyrrverandi ætti ekki að þurfa að dragast aftur úr öðrum löndum sem stefna inn í ESB. „Það þjónar ekki hagsmunum landsins, ekki hagsmunum Balkanskaga og sannarlega ekki hagsmunum Evrópusambandsins."

Frá lokum stríðsins sem stóð frá 1992-1995 hefur Bosnía verið land sem skiptist í tvö sjálfsstjórnarsvæði, sambandsríki múslíma og Króata, og serbneska hlutan Republika Srpska. Svæðin hafa sameiginlega yfirstjórn en auk þess hvort um sig eigin ríkisstjórn. Alþjóðasambandið, ekki síst ESB, vill að miðstýring landsins verði styrkt í sessi til að greiða götu ýmissa breytinga sem þurfa að ganga í gegn svo landið geti fengið inngöngu í ESB og NATO. Klofningur milli Bosníu-múslima og Bosníu-Serba hefur hinsvegar staðið miðstýringunni fyrir þrifum.