Anna Lindh. mbl.is

Sænska landlæknisembættið hefur ákveðið að láta fara fram rannsókn á því, hvernig læknismeðhöndlun á Önnu Lindh, þáverandi utanríkisráðherra Svíþjóðar, var háttað eftir að hún var stungin með hnífi í verslunarmiðstöð í Stokkhólmi fyrir sjö árum.

Fjallað var um málið í sænskum sjónvarpsþætti á sunnudag, Kalla fakta á TV4. Þar sagði bandarískur sérfræðingur, að hægt hefði verið að stöðva innvortis blæðingar, sem leiddu Lindh til dauða.

Lindh var flutt á Karolinska háskólasjúkrahúsið í Stokkhólmi, síðdegis 10. september 2003, eftir að karlmaður réðist á hana með hníf að vopni í NK verslunarmiðstöðinni. Lindh var með meðvitund eftir árásina og fyrstu fréttir bentu til þess, að hún hefði verið stungin í handlegginn og væri ekki í lífshættu. Hún gekkst undir aðgerð eftir að hún kom á sjúkrahúsið og klukkan 5:29 morguninn eftir lést hún af blóðmissi vegna innvortis áverka. Í ljós kom að hnífurinn hafði skorið mikilvægar æðar í sundur og einnig voru áverkar á lifrinni. 

Leitað verður til erlendra sérfræðinga til að fara yfir þá meðferð, sem Lindh fékk á sjúkrahúsinu. Sérfræðingar sjúkrahússins sjálfs hafa farið yfir skýrslur og ekkert fundið athugavert.