Það er kominn tími á frelsi og lýðræði á Kúbu, sagði kúbverski mótmælandinn Guillermo Farinas í dag, þegar hann tók við Sakharov verðlaununum, sem Evrópuþingið afhendir árlega fyrir mannréttindabaráttu. Farinas tileinkaði verðlaunin öllum þeim sem berjist fyrir „endalokum einræðis".

„Evrópuþingið og hinn siðaði heimur eru að senda þau skilaboð til yfirvaldsins á Kúbu að það sé kominn tími á lýðræði, hugsanafrelsi og tjáningarfrelsi á Kúbu og tími fyrir endalok einræðisins," hefur AFP eftir Farinas.

Í upphafi studdi Farinas sjálfur byltinguna og Fidel Castro. Faðir hans barðist við hlið Che Guevara í Kongó 1965. En Farinas fjarlægðist fljótt leiðtoga Kúbu. Á 9. áratugnum gekk hann úr ungmennasamtökum kommúnista og til liðs við stjórnarandstöðuna. Hann hefur margsinnis gripið til hungurverkfalla til að þrýsta á umbætur í átt að frelsi fyrir Kúbverja og hefur allt í allt setið í 11 ár í fangelsi vegna baráttu sinnar. 

Hann sagðist jafnframt ekki líta svo á að verið væri að veita honum einum verðlaunin, heldur „öllum Kúbverjum, sem hafa síðustu 50 ár barist fyrir því að losna undan harðstjórninni. Þau okkar sem veitum friðsamlega stjórnarandstöðu á Kúbu erum sýnilegust." Farinas er 48 ára gamall og sálfræðingur og blaðamaður.