Bandarískir hermenn. Reuters

Áfrýjunardómstóll í Bandaríkjunum úrskurðaði í gær að herinn hefð nú aftur heimild, tímabundið, til þess að banna herþjónustu fólks sem er opinberlega samkynhneigt. Því var aðeins tekið við umsóknum samkynhneigðra í einn sólarhring, en herinn óskaði eftir því að þar til áfrýjun yrði tekin fyrir skildi bannið ríkja tímabundið.

Varnarmálaráðuneyti Bandaríkjanna, Pentagon, rannsakar nú af kappi hvernig unnt verði að opna herinn fyrir samkynhneigðum og vilja margir halda því fram að það kalli á flóknar breytingar í ýmsum verkferlum svo að vel megi verða. Barack Obama Bandaríkjaforseti og nokkrir æðstu yfirmenn hersins hafa kallað eftir því að bannið verði afnumið, en Obama vill að það verði gert með löggjöf fremur en dómsúrskurði.

Tugir annarra hernaðarþjóða heimila samkynhneigðum að gegna herþjónustu, þar á meðal Bretar og Ísraelsmenn. Samkvæmt löggjöf frá 1993 sem Bill Clinton fékk samþykkta er yfirmönnum í Bandaríkjaher óheimilt að spyrja hermenn um kynhneigð þeirra, en komist upp að þeir séu samkynhneigðir má reka þá. Talsmenn fyrir réttindum samkynhneigðra hermanna hafa hvatt skjólstæðinga sína til að þegja enn um sinn um kynhneigð sína þar til óvissunni verði aflétt.