Serbneskir ríkisborgarar sem reyna að sækja um hæli í ríkjum Evrópusambandsins ættu að hætta því þar sem þeir verða sendir heim með hraði, segir Ivica Dacic, innanríkisráðherra Serbíu.

„Við verðum að senda skýr skilaboð um að þeir fái ekki pólitískt hæli. Sem þýðir að ferðalag þeirra er tilgangslaust og þeir verða allir sendi heim til Serbíu, hefur Beta fréttastofan eftir Dacic.

Dacic, sem átti fund með ráðherra efnahagsmála í Bæjaralandi, Emilia Müller, í dag segir að serbnesk stjórnvöld hafi unnið náið með ESB-ríkjum sem hafa tekið á móti fjölda hælisleitenda frá Serbíu og Makedóníu að undanförnu.

Flestir hælisleitendanna eru sígaunar (roma) og Albanir frá suðurhluta Serbíu. Í samstarfi við viðkomandi yfirvöld hefur því verið skilmerkilega komið á framfæri að það að frelsi til að ferðast án vegabréfa þýði ekki að þeir hafi rétt til vinnu og búsetu í ríkjum ESB. Sérstaklega ekki að þeir geti sótt um hæli, segir Dacic.

Evrópusambandið hefur varað Serbíu og Makedóníu við því að löndin gætu misst réttin á að þegnar þeirra fái að ferðast án vegabréfs ef þeim tekst ekki að koma í veg flóð hælisleitenda frá löndunum tveimur.

Í desember í fyrra heimilaði ESB ríkisborgurum fyrrum Júgóslavíu, Serbíu, Makedóníu og Svartfjallalands, að ferðast án vegabréf til þeirra 25 ríkja ESB sem eru hluti af Schengen landamærasamstarfinu. Viðræður eru í gangi um sama rétt íbúa Albaníu og Bosníu.

Tæplega 390 Serbar, 210 íbúar Makedóníu og 736 frá Kósóvó hafa óskað eftir hæli í Belgíu í júlí og ágúst. 

Svíar og Norðmenn hafa einnig glímt við straum fólks frá Balkanlöndunum og hafa löndin þurft að vísa hælisleitendum frá.