Hermenn í Írak. Reuters

Skjöl, sem vefsíðan WikiLeaks birti í nótt um hernaðaraðgerðirnar í Írak, sýna að danski herinn í Írak afhenti íraskri lögreglu í það minnsta 62 fanga þótt vitað væri, að fangar sættu pyntingum og misþyrmingum af hálfu írösku lögreglunnar. 

WikiLeaks hefur birt 391.832 bandarísk leyniskjöl þar sem eru upplýsingar um hernaðinn í Írak frá innrásinni í mars 2003 og til ársins 2009. 

Danskir fjölmiðlar rifja það upp í dag, að danska varnarmálaráðuneytið hafi árið 2006 veitt varnarmálanefnd danska þingsins þær upplýsingar í ágúst 2006 að danski herflokkurinn í Írak hafi handtekið 21 mann á árunum 2005 og 2006. Ekki kom fram, að þeir hefðu verið fengnir lögreglu í Írak í hendur.

Af skjölunum, sem danska blaðið Information fékk aðgang að hjá WikiLeaks áður en þau voru birt, má ráða að danskir hermenn hafi tekið þátt í að handtaka 95 Íraka og af þeim voru 65 afhentir írösku lögreglunni. 

Heimildarmenn Information innan danska hersins segja, að mismunurinn á tölum um fjölda fanga, sem varnarmálaráðuneytið birt og þeim tölum sem koma fram í skjölum WikiLeaks, stafi af því að í byrjun 2004 fóru danskir hermenn að taka með sér breska hermenn í aðgerðir gegn íröskum uppreisnarmönnum. Það hafi því verið Bretarnir, sem handtóku Írakana og báru ábyrgð á handtökunum.

Sérfræðingar í mannréttindamálum segja hins vegar að þessi rök haldi ekki vatni.

Vefur WikiLeaks