Angela Merkel vill breyta Lissabon-sáttmálanum til að bregðast við efnahagsvandanum. Reuters

Leiðtogar Evrópusambandsríkjanna deila nú hart um tillögur Frakka og Þjóðverja um breytingar á Lissabon-sáttmálanum til þess að koma í veg fyrir efnahagsáföll eins og það sem átti sér stað í Grikklandi geti endurtekið sig.

Tveggja daga ráðstefna leiðtoganna hófst í dag og verður þar freistað þess að komast að samkomulagi um að herða ákvæði um sameiginlega stjórn fjármála innan sambandsins. Þjóðverjar leggja m.a. til að þau lönd sem fari ítrekað gegn reglum um stjórn fjármála innan sambandsins missi atkvæðarétt.

Flest evrulöndin innan sambandsins eru fylgjandi því að björgunarsjóður sem komið var á fót í kjölfar efnahagshrunsins í Grikklandi verði gerður að varanlegum sjóði. Þýskaland lagði mest af mörkum til sjóðsins á sínum tíma en þýsk stjórnvöld vilja nú meina að samkvæmt stjórnarskrá sinni geti þau ekki haldið áfram að veita fé í hann undir núgildandi ákvæðum Lissabon-sáttmálans án þess að stjórnlagadómstóll landsins skerist í leikinn. Því séu breytingar á sáttmálanum nú nauðsynlegar.

Leiðtogar aðildarlandanna hafa sýnt tillögu Þjóðverja um breytingar skilning en fálega hefur verið tekið í þær hugmyndir að skerða atkvæðarétt aðildarlanda.

„Ég geri mér grein fyrir því að Þjóðverjar telja sig vera í klípu með stjórnarskrá sína og við þurfum að taka því alvarlega,“ sagði danski forsætisráðherrann Lars Lokke Rasmussen. Fredrik Reinfeldt, forsætisráðherra Svíþjóðar, tók í sama streng og sagði að málið snerist um smávægilegar breytingar sem hægt væri að koma í gegn án þess að efna þyrfti til þjóðaratkvæðagreiðslu um þær. 

José Manuel Barroso, forseti framkvæmdastjórnar ESB, sagðist geta fellt sig við takmarkaðar breytingar á sáttmálanum en það að draga úr atkvæðarétti væri óviðunandi.