Stjórnvöld í Jemen hafa tilkynnt um að eftirlit með öllum farmflutningum verði aukið í landinu eftir að tvær sprengjur fundust um borð í flutningavélum sem komu frá Jemen á föstudag. Eftirlit verður ekki einungis aukið með allri fragt um flugvelli í Jemen heldur verður allt eftirlit á flugvöllum stóraukið.

Samkvæmt heimildum AFP fréttastofunnar var sprengjan sem var um borð í flugvél flugfélagsins Qatar Airways, og fannst í Dubaí, um borð í farþegaþotu.

Sprengjan var inni í tölvuprentara og var hún tengd farsíma. Hins sprengjan fannst um borð í flutningavél á East Midlands flugvellinum i Bretlandi. Haft var eftir forsætisráðherra Bretlands, David Cameron, að ætlunin hafi verið að sprengja flugvélina upp.

Fljótlega eftir að sprengjan fannst bönnuðu Bretar alla fragtflutninga frá Jemen, þar á meðal millilendingar fragtvéla sem koma við í Bretlandi á leið sinni til annarra landa. Þjóðverjar og Frakkar gripu til svipaðra aðgerða um helgina.

Samkvæmt heimildum AFP er Ibrahim Hassan al-Asiri, sem er 28 ára, grunaður um að hafa búið til sprengjurnar en ekki hefur tekist að hafa hendur í hári hans.

Þykir ferill Al-Asiri við sprengjugerð minna mjög á hvernig þessar sprengjur voru útbúnar sem fundust seint á fimmtudagskvöld og á föstudag. Hans er leitað vegna fleiri tilræða.

Bróðir hans, Abdullah, reyndi að myrða aðstoðarinnanríkisráðherra Sádi-Arabíu í sjálfsmorðsárás fyrir rúmu ári með sprengju sem hann var með innan klæða. Talið er líklegt að al-Asiri hafi einnig búið til sprengju sem Nígeríumaður faldi í nærfatnaði sínum og reyndi að sprengja í farþegaþotu yfir Bandaríkjunum á jóladag á síðasta ári. Í nærbuxum hans fundust 80 grömm af sprengiefninu PETN, hið sama og fannst í annarri sprengjunni nú.