Fíkniefnastríðið í Mexíkó hefur kostað margan manninn lífið. STRINGER/MEXICO

Ekkert lát er á blóðbaðinu glæpagengja í Mexíkó en fjórir menn voru skotnir til bana í Acapulco í dag. Þá var sex líkum hent úr bifreið í austurhluta landsins.

Lögregla fann lík mannanna fjögurra sem allir voru um 18 ára gamlir við veg í borginni og voru þau öll með fjölda skotsára.

Yfir þrjátíu manns hafa látið lífið í ofbeldisverkum í Acapulco á síðustu tíu dögum. Þá var kanadískum kaupsýslumanni rænt í síðustu viku og er óttast að hann hafi verið myrtur. Fyrir um mánuði síðan var um tuttugu mexíkóskum ferðamönnum rænt í borginni.

Um síðustu helgi fækkaði gistinóttum á hótelum í þessari frægu ferðamannaborg í kringum 40% frá árinu áður og er áframhaldandi voðaverk talin ástæðan fyrir því.

Þá var líkum sex manna kastað úr bíl á ferð í Veracruz-fylki að sögn vitna. Bílinn var nýkominn yfir landamærin frá nágrannafylkinu Tamaulipas þar sem mikil aukning hefur verið í eiturlyfjatengdu ofbeldi á þessu ári. Það var þar sem 72 innflytjendur frá Mið- og Suður-Ameríku voru stráfelldir í ágúst.

Alls hafa yfir 28.000 manns beðið bana í landinu í átökum glæpagengja tengdum eiturlyfjasölu. Hefur fjöldi látinni aukist eftir að herinn blandaði hóf baráttu gegn gengjunum árið 2006.