Rupert Murdoch Reuters

Um 105.000 manns hafa greitt til þess að lesa bresku blöðin The Times og The Sunday Times á Netinu eftir að byrjað var að rukka fyrir vefútgáfu þeirra. Um helmingur þeirra eru mánaðarlegi áskrifendur blaðanna að sögn News International, útgáfufyrirtæki blaðanna sem er í eigu auðkýfingsins Ruperts Murdochs.

Dagblöðin hafa frá því í júlí rukkað eitt pund á dag eða tvö pund á viku til að lesa blöðin á Netinu. Aðrir fjölmiðlar um allan heim fylgjast grannt með tilrauninni þar sem sala á dagblöðum dregst sífellt meira saman og auglýsendur færa sig í auknum mæli yfir á Netið.

Í september seldist The Times í 468.868 eintökum en það er lækkun um 15% frá því í sama mánuði í fyrra. The Sunday Times seldist í rúmum milljón eintaka og er það lækkun um 10% milli ára. 

Yfirmenn blaðsins segjast ánægðir með tölurnar nú. „Þetta styrkir þá trú okkar að blaðamennska sé einhvers virði og að viðskiptavinirnir bregðist við þeim fjárfestingum, nýjungum og gæðum sem eru vörumerki blaða okkar og fyrirtækis,“ sagði James Murdoch, stjórnarformaður fyrirtækisins og framkvæmdastjóri Evrópu- og Asíudeildar þess.

Aðrir segja að tölurnar sem nú liggi fyrir gefi ekki nægar upplýsingar til þess að draga ályktanir um hvort að tilraunin hafi heppnast.