Franskir dómstólar fyrirskipuðu í dag að rúanska uppreisnarleiðtoginn Callixte Mbarushimana verði framseldur til Hollands þar sem honum hefur verið stefnt fyrir Alþjóðlega stríðsglæpadómstólinn. Mbarushimana er ákærður í 11 liðum fyrir stríðsglæpi og glæpi gegn mannkyni sem hann er sagður hafa framið í Lýðveldinu Kongó í fyrra.

Mbarushimana var handtekinn í Frakklandi í október. Hann neitar ásökununum. Dómstóll í París samþykkti í dag kröfu um framsal hans til Haag, gegn því skilyrði að honum verði "undir engum kringumstæðum hleypt aftur til Rúanda".

Uppreisnarhópur Mbarushimana, sem samanstendur af rúönskum Hútúum sem kalla sig FDLR, er m.a. sakaður um að hafa nauðgað hundruðum manna í Lýðveldinu Kongó í fyrra. Þá eru sumir meðlimir hópsins sakaðir um að taka þátt í þjóðarmorði á Tútsum í Rúanda árið 1994. Mbarushimana og FDLR hópurinn flýðu til Lýðveldisins Kongó eftir að Tútsar náðu völdum í Rúanda og bundu endi á þjóðarmorðin.

FDLR hópurinn er nú einn valdamesti uppreisnarhópur í austurhluta Lýðveldisins Kongó og er talið að þeir hafi dregið til sín milljónir Bandaríkjadala á ári með því að taka yfir stjórn gullnáma á svæðinu og kúga fé út úr heimamönnum. Mbarushimana hefur sjálfur búið í París síðustu ár og lýsir uppreisnarhópnum sem frelsishreyfingu sem vilji "frelsa íbúa Rúanda undan oki fasistastjórnarinnar".