Íbúar í tjaldbúðum á Haítí sækja sér drykkjarvatn. EDUARDO MUNOZ

Hitabeltisstormur stefnir nú á Haítí og reyna yfirvöld þar að rýma tjaldbúðir sem settar voru upp eftir jarðskjálftann í janúar. Íbúar búðanna mótmæla því hinsvegar margir og segjast hvort eð er ekki hafa neitt annað að leita.

Stormurinn Tómas er talin munu ná því stigi að kallast fellibylur um það leyti sem hann skellur á Karíbahafseyjunni á morgun. Ljóst er að honum munu fylgja gríðarlegar rigninga og stífur vindur sem er vís til að auka enn á eymd þeirra 1,3 milljóna manna sem eru heimilislausar eftir jarðskjálftann.

Tómas hefur nú þegar valdið dauða 14 manna, á eyjunni St. Lucia. Í dag gengur hann yfir Jamaíka en búist er við að hann gangi yfir Haítí og Guantanamo flóa á Kúbu snemma á föstudagsmorgni. Forseti Haítí, Rene Preval, fór um landið í dag og í gær og biðlaði til landa sinna sem búa á áhættusvæðum að flýja. Skólum hefur verið lokað og verða sumir þeirra notaðir sem neyðarskýli. Margir vilja ekki yfirgefa tjöldin þar sem þeir hafa búið sér tímabundið heimili, án þess að hafa staðfestingu á því að þeim muni bjóðast öruggt skjól annars staðar.

Í stærstu tjaldbúðunum, Corail Cesselesse, undirbjuggu íbúar fjöldamótmæli í dag, þar sem þeir óttast að þeir muni missa það litla sem þeir eiga verði þeir neyddir til að færa sig um set vegna óveðursins. Meirihluti haítísku þjóðarinnar, sem telur um 10 milljónir manna, búa við ótryggar aðstæður og er viðkvæmur fyrir náttúruhamförum.