Bresk blöð fara í dag hörðum orðum um námsmenn, sem brutu sér leið inn í höfuðstöðvar breska Íhaldsflokksins í miðborg Lundúna í gær í tengslum við mótmælaaðgerðir gegn áformum um hækkun skólagjalda í háskólum. 

Blöðin eru almennt þeirrar skoðunar, að mótmælendur hafi skaðað málstað sinn með því að brjóta rúður í Millbankturninum og ryðjast inn í anddyri byggingarinnar. Talið er að 14 manns hafi slasast, þar af var um helmingur lögreglumenn.  

Talið er að um 50 þúsund manns hafi tekið þátt í aðgerðunum í gær og komu námsmenn og kennarar til borgarinnar hvaðanæva að úr landinu. Lögreglan var ekki með mikinn viðbúnað og það kom henni í opna skjöldu þegar lítill hópur mótmælenda fór í gegnum raðir lögreglumanna og réðust á bygginguna. 

Nokkrum mótmælendum tókst að komast upp á þak byggingarinnar og þaðan köstuðu þeir hlutum á lögregluna fyrir neðan, þar á meðal slökkviliðstækjum.  

David Cameron, forsætisráðherra Bretlands og leiðtogi Íhaldsflokksins, fordæmdi aðgerðir námsmannanna í dag og sagði að sækja ættu þá til saka, sem vildu beita ofbeldi. Hann sagði einnig, að viðbrögð lögreglu hefðu ekki verið viðunandi.