Karlmaður, sem lögreglan í Kaupmannahöfn handtók í gær, grunaðan um morð og nauðganir á 20 ára tímabili, var í dag úrskurðaður í gæsluvarðhald til 8. desember. Honum var einnig gert að gangast undir geðrannsókn. Maðurinn neitar sök en ákvað að kæra ekki gæsluvarðhaldsúrskurðinn. 

Lögreglan komst á sporið eftir að 17 ára stúlku var nauðgað á Amager í Kaupmannahöfn í september. Þá leiddu rannsóknir á lífssýnum, sem fundust, í ljós að um var að ræða sama mann, sem myrti fertuga konu á Amager árið 1990 og nauðgaði 24 ára gamalli konu árið 2005, einnig á Amager.

Lögreglan óskaði eftir ábendingum frá almenningi og var meðal annars bent á manninn, sem býr í Valby en bjó áður á Amager og starfar þar. Tekin voru DNA-sýni úr manninum og í gær var ljóst að þau pössuðu við lífssýnin, sem fundur á vettvangi glæpanna.    

Saksóknari sagði í réttarsalnum í dag, að fleiri gögn bentu til sektar mannsins en vildi ekki upplýsa hvers konar gögn það væru. 

Að sögn blaðsins B.T. er maðurinn knattspyrnuþjálfari, sem hefur þjálfað knattspyrnulið fyrir félag á Amager. Hann á tvo syni á unglingsaldri en býr einn.