Einn hluti skiltisins sem hafði verið bútað í sundur. Reuters

Sænskur nýnasistaleiðtogi sem sakaður er um að hafa hafa látið stela skiltinu fyrir ofan hlið útrýmingarbúðanna í Auschwitz mun sitja af sér 32 mánuði í fangelsi í Svíþjóð eftir að samkomulag náðist í máli hans við pólsk yfirvöld.

Anders Hoegstroem sem játaði sekt sína áður en málið kom til kasta dómstóla í Póllandi en hann átti á hættu að vera dæmdur í tíu ára fangelsi ef málið hefði verið tekið fyrir þar.

Í fyrstu neitaði Hoegstroem að bera ábyrgð á stuldinum í yfirheyrslum en játaði síðar að sögn saksóknarans Roberts Parys. „Hann náði samkomulagi við saksóknara, hann samþykkti refsingu upp á tvö ár og átta mánuði í fangelsi sem hann mun sitja af sér í Svíðþjóð.“

Hoegstroem var handtekinn í Svíþjóð eftir að handtökuskipun var gefin út á hendur honum í Póllandi vegna gruns um að hann hafi látið stela hinu alræmda skilti sem trónir yfir hliði Auschwitz þar sem segir „Arbeit macht frei“.

Pólska lögreglan fann hið fimm metra langa skilti tveimur dögum eftir að það hvarf seint á síðasta ári. Hafði það verið bútað niður í þrjá hluta. Voru fimm pólskir karlmenn handteknir í kjölfarið og ákærðir fyrir þjófnaðinn. Þrír þeirra hafa þegar verið dæmdir til tveggja og hálfs árs fangelsisvistar. Hinir tveir bíða þess enn að réttað verði yfir þeim.

Árið 1994 stofnaði Hoegstroem nýnasistahreyfingu í Svíþjóð og stjórnaði henni í fimm ár þar til hann hætti. Sagði hann sænskum fjölmiðlum að hann hafi verið milliliður sem hafi átt að komast yfir skiltið og selja það tilvonandi kaupanda. Bætti hann við að hann hefði sagt pólsku lögreglunni hverjir stæðu á bak við ráðabruggið.

Af þeim sex milljónum gyðinga sem fórust í Helförin var ein milljón þeirra myrt í Auschwitz, aðallega í hinum alræmdu gasklefum. Þá voru tugir þúsunda Pólverja, sígauna og sovéskra stríðsfanga myrtir í útrýmingarbúðunum.