Hengdur fyrir nauðganir

Íranskur maður var hengdur fyrir að nauðga nokkrum konum í borginni Isfahan samkvæmt írönsku stúdentablaði. Ekki kemur fram hvenær aftakan fór fram. Íran er eitt þeirra landa þar sem flestar dauðarefsingar fara fram í heiminum.

Maðurinn var aðeins nafngreindur sem Hossein M. en hann var fundinn sekur um að nauðga nokkrum konum eftir að hafa boðið þeim far og síðan hótað þeim að drepa þær.

Með aftöku mannsins er fjöldi dauðarefsinga sem fram hafa farið í Íran í ár 145 samkvæmt talningu fréttaveitunnar AFP á þeim tilfellum sem fjölmiðlar í landinu hafa greint frá. Að minnsta kosti 270 voru teknir af lífi þar árið 2009.

Íran er eitt af þeim löndum í heiminum þar sem fjöldi dauðarefsinga á ári er hvað hæstur ásamt Kína, Sádi-Arabíu og Bandaríkjunum. Að sögn yfirvalda í landinu er dauðarefsingin nauðsynleg til þess að tryggja almannaöryggi og er henni einungis beitt eftir ítarlega umfjöllun réttarkerfisins.

Dauðarefsing liggur við morðum, nauðgunum, vopnuðum ránum, fíkniefnasmygli og framhjáhaldi í Íran.

• 1 blogg um fréttina

Bloggað um fréttina

• Sigrún Einars: Framför