Kínversk stjórnvöld eru þreytt á hernaðarbrölti Norður-Kóreumanna, sem kínverskir embættismenn kalla „ofdekrað barn“. Þetta kemur fram í leyniskjölunum sem Wikileaks birti í dag og segir ennfremur að Kínverjar séu sífellt hlynntari því að Norður- og Suður-Kórea verði sameinuð í eitt ríki.

Fjallað er um þetta á vef breska dagblaðsins The Guardian. Bent er á að Kínverjar hafi neitað að fordæma hernaðagerðir N-Kóreumanna, sem skutu á s-kóreska eyju í síðustu viku með þeim afleiðingum að fjórir létust og bæði ríkin hótuðu að fara í stríð við hvort annað.

Guardian segir að svo virðist sem að afstaða Kínverja sé að breytast og að þeir séu að láta undan bandarískum þrýstingi um að aðstoða við lausn deilunnar. Boðað hafi verið til neyðarfunda og þá hafi hátt settum n-kóreskum embættismönnum verið boðið til Peking.

Þá segir að stjórnvöld í Kína hafi auknar áhyggjur af nágrönnum sínum í N-Kóreu í kjölfar eldlflauga- og kjarnorkutilrauna þeirra í fyrra. Þá hafa Kínverjar áhyggjur af efnahagslegum óstöðugleika á svæðinu og að valdabarátta muni hefjast og átök mögulega brjótast út í landinu þegar Kim Jong-il er heldur á vit forferðra sinna.

Guardian segir að þetta komi fram í skjölunum sem Wikileaks hefur lekið á netið.

Umfjöllun The Guardian.