Sautján létust vegna kuldans í Mið-Evrópu síðasta sólarhringinn og hafa því 45 látist á því svæði undanfarna daga. Ellefu til viðbótar hafa látist í Rússlandi auk þriggja í Frakklandi og einn er látinn í Þýskalandi, samkvæmt upplýsingum AFP fréttastofunnar frá yfirvöldum í viðkomandi ríkjum.

Að minnsta kosti 30 eru látnir í Póllandi í vikunni, flestir þeirra heimilislausir. Er um fimmtán stiga frost víða í Póllandi en frostið fór í tuttugu gráður í Skotlandi í dag.

Flug hófst á ný um Gatwick flugvöll í Lundúnum í dag eftir tveggja daga lokun vegna fannfergis en miklar tafir eru á flugi um Heathrow flugvöll í Lundúnum og um flugvöllinn í Glasgow.

Eins hefur þurft að aflýsa mörgum ferðum járnbrautarlesta í dag vegna vetrarríkisins. Fjölmargir skólar voru lokaðir víða um Evrópu í dag vegna kuldans.

Á sama tíma og fólk kvartar undan kulda og snjó víða í Evrópu eru íbúar annars staðar í Evrópu eða á Balkanskaganum að berjast við vatnsveður. Hefur úrhellisrigning valdið því að margar ár hafa flætt yfir bakka sína og fólk þurft að yfirgefa heimili sín í Albaníu, Bosníu, Serbíu og Svartfjallalandi. Um sjö þúsund íbúar Albaníu hafa verið fluttir frá heimilum sínum en ástandið er mjög alvarlegt á sumum svæðum, að sögn forsætisráðherra Albaníu, Sali Berisha. Þúsundir húsa hafa skemmst í vatnselgnum og vegir í kringum höfuðborgina, Tirana, eru lokaðir.

Í Bosníu hafa stjórnvöld lýst yfir neyðarástandi eftir að um eitt þúsund heimili fóru á flot í bænum Bejeljina í nágrenni Drina fljótsins.

Í Serbíu hafa um 1.400 verið fluttir í burtu úr bænum Loznica vegna vatnavaxta í Drina en fljótið er á landamærum Serbíu og Bosníu. 

Í Svartfjallalandi var 1.300 manns gert að yfirgefa heimili sín vegna flóðanna þar.